ગૌચર જમીન પર ગેરકાયદેસર દબાણના આક્ષેપ: German Green Steel Power Ltd. સામે ભચાઉ SDMને રજૂઆત
પ્રદૂષણ, ગૌચર જમીન અને શ્રમ કાયદાના ભંગના આક્ષેપો: German Green Steel Power Ltd. સામે તપાસની માંગ
ભચાઉ SDMને German Green Steel Power Ltd. સામે કાર્યવાહી કરવા રજૂઆત, ગૌચર જમીન પર દબાણ અને પ્રદૂષણના આક્ષેપ
કાર્યવાહી નહીં થાય તો ઉગ્ર આંદોલનની ચીમકી: German Green Steel Power Ltd. સામે ગ્રામજનોની લડત તેજ
ભચાઉ: ભચાઉ તાલુકાના સામખિયાળી ગામ નજીક કરછ–અમદાવાદ નેશનલ હાઇવે પર આવેલી German Green Steel Power Limited કંપની સામે વિવિધ ગંભીર મુદ્દાઓને લઈને ભચાઉના પ્રાંત અધિકારી (SDM) જ્યોતિ ગોહિલને લેખિત રજૂઆત કરવામાં આવી છે. રજૂઆતમાં આક્ષેપ કરવામાં આવ્યો છે કે કંપની દ્વારા લાકડિયા ગામની ગૌચર જમીન પર ગેરકાયદેસર દબાણ કરવામાં આવ્યું છે. આ જમીન પર હિંદુ બ્રહ્મ સમાજના સુરાપુરા દાદાની મૂર્તિ પણ આવેલી હોવાથી ધાર્મિક લાગણીઓને ઠેસ પહોંચી રહી હોવાનો પણ ઉલ્લેખ કરવામાં આવ્યો છે. સમગ્ર મામલે તપાસ કરીને ગુજરાત લેન્ડ ગ્રેબિંગ પ્રતિબંધ સંબંધિત કાયદા હેઠળ જવાબદારો સામે કાર્યવાહી કરવાની માંગ કરવામાં આવી છે. રજૂઆતમાં વધુમાં જણાવાયું છે કે આ મુદ્દે અગાઉ તાલુકા–જિલ્લા સંકલન બેઠકમાં પણ રજૂઆત થઈ હોવા છતાં હજુ સુધી કોઈ અસરકારક કાર્યવાહી કરવામાં આવી નથી. કંપનીના જવાબદારો રાજકીય વગનો ઉપયોગ કરીને સ્થાનિક લોકોમાં ભયનો માહોલ ઉભો કરતા હોવાનો પણ આક્ષેપ કરવામાં આવ્યો છે.
સ્થાનિક ગ્રામજનોના જણાવ્યા મુજબ કંપની દ્વારા આસપાસના વિસ્તારોમાં ભારે પ્રદૂષણ ફેલાવવામાં આવી રહ્યું છે, જેથી પ્રદૂષણ નિયંત્રણ માટે તાત્કાલિક પગલાં ભરવાની માંગ કરવામાં આવી છે. સાથે જ સ્થાનિક લોકોને પૂરતું રોજગાર ન આપવાનો પણ મુદ્દો ઉઠાવવામાં આવ્યો છે. રજૂઆતમાં કંપનીમાં કામ કરતા તમામ કર્મચારીઓના આધાર કાર્ડનું ફરજિયાત વેરિફિકેશન કરાવવા, શ્રમ કાયદાનું પાલન થાય છે કે નહીં તેની તપાસ કરવા, બાળમજૂરી સહિતના મુદ્દાઓની તપાસ કરવા તેમજ સલામતીના નિયમોના પાલનની ચકાસણી કરવાની માંગ કરવામાં આવી છે. કેટલાક શંકાસ્પદ કામદારો અંગે પણ યોગ્ય તપાસ કરવાની માંગ કરવામાં આવી છે. અંતમાં રજૂઆતમાં ચેતવણી આપવામાં આવી છે કે જો તાત્કાલિક તપાસ કરીને યોગ્ય કાર્યવાહી કરવામાં નહીં આવે તો આસપાસના ગ્રામજનોને સાથે રાખીને કંપની વિરુદ્ધ ઉગ્ર આંદોલન કરવામાં આવશે તેમજ સમગ્ર મામલો રાજ્ય સરકાર સમક્ષ પણ રજૂ કરવામાં આવશે.
Post a Comment