રાપર તાલુકાના નાગપુર-લોદ્રાણી ખાતે BSF જવાનો સાથે ભવ્ય રક્ષાબંધન ઉજવણી

રાપર, તા. 28 ઓગસ્ટ, 2026

રાપર તાલુકાના નાગપુર-લોદ્રાણી ગામે આવેલા BSF કુડા કેમ્પ ખાતે દર વર્ષની પરંપરા મુજબ આ વર્ષે પણ રક્ષાબંધનનો પવિત્ર તહેવાર ભવ્ય અને ભાવભેર ઉજવવામાં આવ્યો હતો. ઉલ્લેખનીય છે કે ગત વર્ષે પણ સાંસદ સભ્ય શ્રી વિનોદભાઈ એલ. ચાવડા દ્વારા BSF કુડા કેમ્પ ખાતે ભવ્ય રક્ષાબંધન ઉજવણીનું આયોજન કરવામાં આવ્યું હતું. આ વર્ષે પણ આ પરંપરા જાળવી રાખતાં દેશની સરહદોની સુરક્ષા માટે ફરજ બજાવતા BSFના જવાનો સાથે રક્ષાબંધનનો પવિત્ર પર્વ ઉજવવામાં આવ્યો હતો.

આ પ્રસંગે બહેનોએ BSFના જવાનોને રાખડી બાંધી રક્ષાબંધનની હાર્દિક શુભેચ્છાઓ પાઠવી હતી. પોતાના પરિવારથી દૂર રહીને દેશની સુરક્ષા માટે દિવસ-રાત ફરજ બજાવતા જવાનો પ્રત્યે બહેનોએ સ્નેહ, આદર અને લાગણી વ્યક્ત કરી હતી. સાથે જ જવાનોના સુખ, સમૃદ્ધિ, સ્વસ્થ જીવન અને દીર્ઘાયુ માટે પ્રાર્થના કરવામાં આવી હતી.

કાર્યક્રમમાં સામાજિક ન્યાય સમિતિ, રાપર તાલુકા પંચાયતના ચેરમેન શ્રીમતી દક્ષાબેન દિલીપભાઈ ધૈડા, માયાભાઈ પુંજાભાઈ ધૈડા, દિલીપભાઈ માયાભાઈ ધૈડા, ગઢવી હરેશદાન ભરતદાન, પરમાર પ્રફુલભાઈ રાયમલભાઈ, પરમાર નરેશભાઈ સામતાભાઈ, રામજીભાઈ ભીમાભાઈ ધૈડા તેમજ સીમા જાગરણ મંચ, પૂર્વ કચ્છના મહામંત્રી શ્રી રાજેશભાઈ સથવારા સહિતની ટીમ ઉપસ્થિત રહી હતી. ઉપસ્થિત મહાનુભાવો અને બહેનોએ BSFના જવાનોને રક્ષાબંધનની શુભકામનાઓ પાઠવી હતી. કાર્યક્રમ દરમિયાન જવાનો અને બહેનો વચ્ચે ભાઈ-બહેનના પવિત્ર સંબંધની લાગણીસભર ક્ષણો જોવા મળી હતી. BSFના જવાનોએ બહેનો દ્વારા આપવામાં આવેલા પ્રેમ, સ્નેહ અને સન્માન બદલ આભાર વ્યક્ત કર્યો હતો. રક્ષાબંધનના આ પાવન પર્વે **“દેશની રક્ષા કરનાર જવાનો પ્રત્યે સમાજની લાગણી, પ્રેમ અને સન્માન”**નો સુંદર સંદેશ પ્રસરી રહ્યો હતો. સમગ્ર કાર્યક્રમ સૌના સહયોગથી હર્ષોલ્લાસ અને ભાવનાત્મક વાતાવરણમાં સંપન્ન થયો હતો.

રિપોર્ટર : ઠક્કર અનિલ, રાપર-કચ્છ